Regjisori Kastrio Çipi i është bashkuar ditën e sotme protestës së artistëve e cila po vazhdon që prej një kohe të gjatë si një qëndresë e vetme për mosprishjen e Teatrit Kombëtar.

Në fjalën e tij Çipi theksoi se Teatri është thuajse inekzistent po ashtu edhe bibliotekat dhe kinematë sepse kjo është një strategji për të zhdukur kulturën në vend.

“Ne kemi teatro që funksionojnë si kombëtare po japin shfaqje vetëm në Tiranë. Teatri është kthyer pothuajse inekzistent. Kjo gjë ka filluar në fillim që nga kinematë. Kjo situatë është dhe me bibliotekat, kemi pasur në Tiranë në çdo lagje bibliotekë, brezi i im e kujton kohën kur lexonin me zell të madh. Ka një strategji për të zhdukur kulturën në këtë vend. Kjo është një strategji shumë e mirë dhe shumë e strukturuar. Sot artistët nuk kanë të drejtë fjalë në kulturë dhe buxhetet kanë ardhur duke u ulur”- u shpreh Çipi.

Më tej Çipi u shpreh se kjo betejë e nisur nga artistët duhet çuar në fund me përpkrahjen e qytetarëve duku u bërë thirrje që të bashkohen të shumtë në numër në mbështetje të kauzës.

“Unë mendoj se artistët që e kanë nisur këtë beteje, dhe mund ta çojnë në fund me përkrahjen tuaj. Nuk mund të mbyllet kjo betejë vetëm me ndërtesën, duhen zgjidhur të gjitha problemet. Arti dhe kultura duhet të jetë në fokus dhe duhet të ketë një buxhet dinjitoz.Buxheti i artit dhe të kulturës duhet të katërfishohet, po na shemben kishat”- tha ai.