Mijëra shqiptarë të Kosovës po dynden drejt rajoneve bregdetare në vendin tonë, për të kaluar pushimet në këto ditë të nxehta gushti.

Por, imazhi me të cilin përballen sapo kalojnë kufirin Kosovë-Shqipëri, është tejet i rënduar.
Këto foto i përkasin segmentit rrugor Kukës-Morin, aty ku pirgje të mëdha mbeturinash janë grumbulluar, duke treguar, se aksioni i ndërmarë nga Ministria e Mjedisit e Turizmit, “Të pastrojmë Shqipërinë që Duam” nuk ka mbërritur deri në Kukës.

Kjo situatë e krijuar, ka shkaktuar një ndotje të ambientit për’rreth, pasi sapo afrohesh në zonën në fjalë, era kumbuese që vjen është e padurueshme.

Një tjetër shqetësim i udhëtarëve që përshkojnë këtë segment rrugor, është edhe derdhja e ujrave të zeza në mes të autostradës, pasi banesat që janë ndërtuar aty, nuk janë të përfshira në rrjetin e kanalizimeve të ujrave të zeza.

Kërkesat e banorëve për ndërhyrje kanë qenë të shpeshta, por deri tani nuk ka ndonjë nismë konkrete për ndërhyrje.