Banka e Shqipërisë miratoi dje në mbledhjen e Këshillit Mbikëqyrës vizatimet e kartëmonedhës së re 10.000 lekëshe dhe elementët e saj të sigurisë.
Në mbledhjen e Këshillit Mbikëqyrës të dhjetorit të vitit 2017, Banka e Shqipërisë miratoi edhe tematikën e kartëmonedhës shqiptare me kurs ligjor me vlerë 10.000 lekë. Kjo kartëmonedhë do të pasqyrojë figurën e poetit të njohur shqiptar, Asdrenit, kombinuar me simbolet figurative të “Flamurit kombëtar”, si dhe një varg të zgjedhur nga “Himni Kombëtar”, që njihet edhe si “Himni i Flamurit”: “Rreth flamurit të përbashkuar me një dëshirë e një qëllim”.
Përveç kësaj, u miratuan tekstet shoqëruese që lidhen me emrin e bankës, vlerën nominale, si dhe u miratuan përmasat e kartëmonedhës.