Një shtetas shqiptar në Itali i ka vënë flakën shtëpisë në shenjë proteste dy javë pasi gruaja dhe dy fëmijët e braktisën duke u larguar nga shtëpia.
B. M., 56 vjeç, me profesion murator, pa precedentë penalë, i vuri flakën në disa vende shtëpisë njëkatëshe, e lidhur edhe me disa të tjera në zonë, në Pistoia, në orën 01.30 të natës.
Tymi që doli nga dritaret alarmoi fqinjët, të cilët njoftuan zjarrfikësit që mbërritën menjëherë, bashkë me karabinierët e zonës.
Ndërkohë shqiptari kishte qëndruar brenda shtëpisë dhe u gjet i intoksikuar nga thithja e tymit, ndërsa zjarri kishte djegur një pjesë të mirë të mobiljeve, por jo në strukturën e shtëpisë.
Gjatë transportimit në spital, muratori pranoi se i vuri zjarrin shtëpisë për shkak të krizës bashkëshortore.
Pavarësisht kryerjes së aktit në dëshpërim e sipër, shqiptari u arrestua nga karabinierët gjatë qëndrimit në urgjencë, për zjarrvënie dhe rrezikim të banorëve të tjerë.