Hetimet e Policisë së Beratit zbuluan një sasi të konsiderueshme lënde narkotike në banesën e një 47-vjeçari.
Landi Bixheku u arrestua në finalizim të një operacioni policor të koduar "Kalaja", vend ku ndodhej shtëpia e tij në lagjen "13 Shtatori", pasi ju gjetën 441 kg Cannabis Sattiva e përpunuar në formën e Çokollatës, 2.5 kilogramë Heroinë dhe një sasi e vogël Kokaine.
Në banesën e të arrestuarit policia zbuloi edhe një arkë me 35 granata ofensive dhe 40 difensive dhe peshore elektronike të cilat u sekuestruan në cilësinë e provës materiale.
Në një njoftim zyrtar për ngjarjen, policia thotë se materialet procedurale i kaluan Prokurorisë së Rrethit Gjyqësor Berat për veprën penale “Prodhim dhe shitje të lëndëve narkotike”, “Mbajtja e armëve dhe municioneve ushtarake”.
