Dy shqiptarë janë vënë në pranga nga policia italiane e Latinës me akuzën e trafikut të drogës e armëmbajtjes pa leje, ndërkohë për një të tretë kanë nisur procedurat e dëbimit nga shteti italian.

Njëri prej shqiptarëve të arrrestuar ishte shpallur në kërkim nga Interpoli.

Në një dalje për mediat, policia italiane tha se operacioni është finalizuar të hënën, 2 tetor 2018.

Tre shqiptarët ishin mbajtur prej kohësh nën kontroll.

Katër kërkime, tri prej të cilave ishin të suksesshme, u kryen midis Latina dhe Aprilia, në veçanti në zonën e Fossignano në kufi me territoret e Anzio dhe Nettuno. 
Të arrestuarit

Shënjestër e policisë ishin tre shtetas me origjinë shqiptare me precedentë të shumtë. Dy u arrestuan dhe për të tretin, i cili gjithashtu ishte ilegal në shtetin fqinj, filluan procedurat e dëbimit. 

Elton Qerreti, i njohur si "Toni", ka përfunduar me pranga, me një numër precedentësh për trafikimin e drogës dhe prostitucion të minorenëve. Gjatë kontrollit, në një zgavër të bodrumit të banesës së tij, u gjet një pistoletë me fishekë.

 Arma ishte fshehur mirë, e paketuar dhe e mbështjellë në celofan. Dyshohet se ajo është vjedhur në  Romë. 
"Një armë shumë e rrezikshme, funksionale dhe gati për tu përdorur", e përshkroi policia.

Nga ana e policisë shkencore po kryhen hetime teknike, daktiloskopike dhe biologjike për të përcaktuar nëse pistoleta është përdorur gjatë kohëve të fundit.