"I paprecedent menaxhimi i protestës së nxënësve në Mengël të Elbasanit”. Kështu e ka cilësuar skandalin e djeshëm në shkollën e Mengëlit, Shoqata e punonjësve të Policisë në Liri. “ E dënojmë dhunën e ushtruar ndaj fëmijëve. Është veprim kundër çdo norme morale, ligjore dhe profesionale nga radhët e Policisë së Shtetit” shtojnë ata. 

Policët në liri i bëjnë thirrje çdo punonjësi policie të refuzojë urdhrat që bien ndesh me ligjin e policisë së shtetit, urdhrat që mohojnë të drejtën e qytetarëve dhe aq më tepër të fëmijëve për të protestuar për një të drejtë që ia jep ligji dhe kushtetuta. Në të kundërt do të përballen ashpër me ligjin për çdo shkelje që ata bëjnë gjatë ushtrimit të detyrës, thonë ata.

“Kur protesta vjen nga fëmijë për një të drejtë themelore si shkolla, më e pakta është përulja ndaj tyre dhe të sigurohet një ambient i qetë dhe i sigurt që ata të shprehin kërkesat e tyre apo mosdakortësinë ndaj vendimit të marrë për mbylljen e shkollës.
Jo vetëm që nuk pamë profesionalizëm në radhët e policisë, por pamë të paparën ndonjëherë më parë, dhunë dhe barbarizëm ç'ka bëhet më e rëndë kur kjo ushtrohet ndaj fëmijëve.
Një akt tjetër ky që tregon qartazi se drejtuesit e Policisë së Shtetit me në krye Ministrin Xhafa nuk kanë merak qytetarin dhe mbrojtjen e tij, por shkatërrimin total të misionit të policisë, inkriminimin e thellë të saj, presionin edhe ndaj strukturave për të shkelur ligjin.
Ne ju mbështesim për sa kohë kryeni detyrën konform ligjit ndërkohë evidentojmë çdo veprim tuajin në kundërshtim të hapur me ligjin për të cilat do jepni llogari.
Në këto vite drejtimi i Policisë së Shtetit është në kundravajte të misionit e ligjit, e ndërsa dje pamë fytyrën më të shëmtuar të saj!” përfundon reagimi i shpërndarë nga Shoqata e punonjësve të Policisë në Liri.