Universitetet e rretheve nuk do të diplomojnë më matematicienë, fizikantë, kimistë dhe Historianë. 41 programe studimi janë mbyllur këtë vit akademik si pasojë e numrit të ulët të të rinjve të regjistruar.

Me mbylljen e raundit të dytë të regjistrimeve rezulton se mbetën ende kuota të lira në degë të ndryshme të cilat arrijnë deri në 7 mijë. Për qëndresën qytetare organizatë jofitimprurëse e cila ka realizuar një analizë mbi këtë situatë, kjo është pasojë e politikave të gabuara që ndjek qeveria shqiptare dhe ministria e Arsimit e cila ka bërë që të rinjtë të kërkojnë largimin nga vendi.

Disa prej arsyeve të renditura në analizën e Qëndresës Qytetarë janë tarifat e larta madje më të larta në Evropë dhe të papërballueshme për familjet shqiptare.

Këtë fakt e vërteton dhe raporti i fondacionit Gjerman Friedrich Ebert në “Pabarazia në Evropën Juglindore” ku theksohet se vetëm 1% e të varfërve shqiptarë kanë akses në arsimin e lartë, ndryshe nga vendet e rajonit ku kjo shifër arrin në 11%.

Një tjetër arsye e renditur në analizë është dhe niveli i lartë i korrupsionit pedagog-student, reformat arsimore të njëpasnjëshme të pastudiuara në 10 vitet e fundit etj.

Universiteti me më shumë programe të mbyllura këtë vit është ai i Gjirokastrës “Eqerem Çabej” me 13 të tillë i ndjekur nga universiteti i Elbasanit “Aleksandër Xhuvani” me 12 degë të mbyllura dhe ato të Shkodrës, Korçës dhe Durrësit.