Këto janë ambientet e një biznesi i cili ka fituar tenderin për të bërë furnizimin me ushqime të disa institucioneve shtetërore.
Shtëpia e Foshnjës dhe ajo e pushimit në Durrës, disa kopshte dhe çerdhe në bashkinë e Skraparit, Lushnjës, Peqinit, Sarandës dhe Përmetit kanë shpallur fitues për furnizimin me ushqim këtë kompani.

“Është një mjedis shumë i egër dhe shumë i pasigurt ai i procedurave të prokurimit, duhet të vendosen kushte që ushqimet të jenë të sigurta, çështja është që pas nënshkrimit të kontratave këto subjekte nuk kush t’i kontrollojë”.

Në një shkresë të siguruar nga Televizioni Klan, Autoriteti Kombëtar i Ushqimit kërkon nga Agjencia e Prokurimit Publik që të përjashtojë këtë subjekt nga pjesëmarrja në tendera. Sipas inspektimeve të bëra, ka rezultuar se kompania ka shkelje të rënda të kushteve higjeno sanitare, ku mungojnë dyert, ndërsa brenda në magazinë ka prani të konsiderueshme myku dhe mjetet e punës janë të ndryshkura. Subjekti po ashtu nuk ka certifikatën e gjurmueshmërisë së sigurisë ushqimore dhe nuk ka sistem vetëkontrolli, ndërsa AKU ka gjobitur dhe mbyllur këtë subjekt. Por pavarësisht kësaj, ai vazhdon të ketë kontratë me institucionet shtetërore që ofrojnë ushqim për fëmijët.

“Nuk duhet të lejohet që të ketë pasiguri ushqimore në subjektet që ofrojnë shërbim për fëmijët, shteti së pari nuk duhet ta lejojë, por duhet kontroll edhe për institucionet arsimore private që kanë kontrata kateringu”.