Komisioni Europian arriti në marrëveshje me Italinë për buxhetin e vitit 2019, gjë që do të shmangë gjobat e Bashkimit Europian kundër Romës. Zv/Presidenti i Komisionit, Valdis Dombrovskis, tha se kjo nuk është zgjidhja ideale, pasi nuk jep zgjidhje për problemet afat-gjata ekonomike të Italisë.

Megjithatë, ai shtoi se marrëveshja do të shmangë procedurat e disiplinës kundër vendit. Dombrovskis tha se vendimi mund të kthehet mbrapsht në Janar, nëse Roma nuk aplikon tërësisht marrëveshjen e rënë dakord me Brukselin.

Sipas kompromisit të arritur, Italia duhet të ulë deficitin publik për vitin e ardhshëm në 2.04% të Produktit të Brendshëm Bruto, nga 2.4% që planifikonte më parë.

Megjithatë, deficiti strukturor, që përjashton zërat e njëhershëm dhe luhatjet e ciklit të biznesit, nuk do të ndryshojë në vitin 2019, krahasuar ne nivelin e 2018-ës. Sipas rregullave të Bashkimit Europian, Roma supozohej të ulte deficitin strukturor me 0.6% të PBB.

Qeveria populiste, në planin fillestar, nuk u bind dhe kërkoi një rritje të deficitit me 1.2%. Kompromisi për mos ndryshimin e nivelit nuk është ideali, sipas Dombrovskis, por lejon Komisionin që të mos gjobisë Italinë.

Dakordësia solli një lehtësim për popullin italian, të cilët shpresojnë se Qeveria mund të vazhdojë tashmë të punojë në planet për vendin.

Klevis Llaha/SCAN