Minierat  vazhdojnë të marrin jetë njerëzish. Vetëm fundjavën që lamë pas u shënuan dy viktima në minierat e Cerujës dhe Bulqizës, ndërkohë që institucionet nuk kanë reaguar përballë këtij fakti.

Konfederata e Sindikatave prej kohësh  e denoncon  në media mungesën e kushteve teknike në shumicën e minierave te vendit, teksa organet shtetërore kanë zgjedhur heshtjen.

KSSH ka organizuar një marshim në Bulqizë ditën e martë në orën 15:00, ndërsa bën me dije se nuk pranohen politikanët t’i bashkohen këtij marshimi.

“Tragjeditë e paralajmërua po vijojnë pa ndërprerje dhe jeta e minatorëve çdo ditë në rrezik e për ta e familjet e tyre askush nuk mendon më.

Pronarët e minierave ku ndodhin këto aksidente janë të lidhur ngushtë me deputete të PS, PD E LSI, të cilët u sigurojnë imunitet.

Konfederata e Sindikatave të Shqipërisë ditën e martë ora 15:30 organizon marshim në Bulqizë, përmes të cilit kërkojmë më shumë siguri për minatorët në punë dhe miratimin e statusit të minatorit.

Janë të ftuar të na bashkohen të gjithë minatorët e Bulqizës e familjarët e tyre, por në mënyrë kategorike nuk do lejojmë që pjesë e marshimit të bëhen politikanët, as të pozitës as të opozitës. Ky marshim për asnjë arsye nuk duhet të politizohet, ndaj ju bëj thirrje të gjithë politikanëve dhe drejtuesve te vendor të kujtdo partie qofshin të mos tentojnë të infiltrohen në protestën tonë legjitime.”-thuhet në njoftim.

 Në reagimin e KSSH i bëhet thirrje edhe partive politike të lënë betejat boshe dhe të miratojnë statusin e minatorit.