Shqiptarët vazhdojnë të vendosin loto sportive, edhe pse një gjë e tillë është e ndaluar me ligj që prej 1 janarit. Andi ka qenë frekuentues i rregullt i lojërave të fatit. I riu nga Elbasani thotë se, pavarësisht se pikat e basteve ulën qepenët, kjo gjë nuk e ka ndaluar atë të luajë bixhoz.

“U hoqën për dikë që e kishte me dy mendje të luante, sepse ai që ka për të luajtur do ta gjejë gjithnjë mundësinë. Por në realitet unë nuk besoj se ka ndryshuar gjë, sepse janë po të njëjtët njerëz, po të njëjtat pika bastesh. Besoj se tani e kanë më të lehtë, sepse nuk paguajnë taksa dhe as kanë licencë”, tha denoncuesi.

Por si vendoset një loto sot? Mjafton të marrësh në telefon personin që është i regjistruar në një kompani të huaj bastesh.

– Do më vesh një loto sepse nuk jam në Elbasan, jam në Tiranë dhe kur të vij t’i jap lekët?
– Në rregull.
– E kam fiksim që Manchester City do ta humbë kampionatin. Do t’i vesh 10 mijë lekë (1.000 lekë) 1-1 me pjesë? Ma dërgo pak biletën pastaj.
– Ta çoj unë me ‘screenshot’ në Whatsapp.

Duket se paratë qarkullojnë me mirëbesim dhe bileta e ndeshjes tashmë është një foto nga sistemi i kompanisë, e cila qarkullon në rrjetet sociale si dëshmi për lojtarin dhe bastvënësin.