Një ngjarje e rëndë ka ndodhur gjatë ditës së djeshme teksa një fëmijë vetëm 12 vjeç ka ndërruar jetë pasi u mbyt në ujrat e lumit. Sipas njoftimit të policisë ngjarja ka ndodhur ditën e djeshme ndërkohë që vetëm sot është bërë e mundur gjetja e tij, 200 metra larg zonës ku banonte.

Njoftimi i plotë:

Më datë 12.05.2019, pasdite, kanë njoftuar familjarët se fëmija i tyre i mitur J.D., vjeç 12, banues në fshatin Dragobi, ka shkuar për të zënë peshk rreth 200 m larg banesës së tyre, në lumin Valbona, dhe nuk është kthyer më. Forcat e Policisë të Komisariatit të Policisë Tropojë së bashku me familjarët dhe banorët e fshatit, kanë vijuar kërkimet për gjetjen e të miturit, ku sot në orët e para të mëngjesit është bërë e mundur gjetja e trupit të pajetë të të miturit, në shtratin e lumit Valbonë, në vendin e quajtur “Ura e Dragobisë”. Nga veprimet e para hetimore dyshohet se i mituri aksidentalisht ka rënë në lumë, ku për pasojë ka humbur jetën. Materialet u referuan në Prokurorine e Rrethit Gjyqësor Tropojë, për hetime të mëtejshme, për ngjarjen aksidentale.