Ndonëse ka kaluar 30 vjet nga publikimi për herë të parë, superhiti “Like a Prayer” i kënduar nga ylli botëror të popit Madona ngjalli entuziazëm në Finalen e Madhe të Eurosong 2019.

Ndërkaq edhe premiera e këngës më të re të saj “Future”në bashkëpunim me reperin Quavo, entuziazmoi publikun.

Ajo foli për vizitën e shumë vendeve të ndryshme gjatë karrierës së saj, duke i bërë thirrje publikut që "të mos harrojë kurrë fuqinë e muzikës për ti bashkuar njerëzit"

"Në fund të fundit, muzika i bën njerëzit bashkë", u shpreh ylli i muzikës pop duke cituar disa vargje shumë te njohura nga hiti i saj “Music”.

Gjithashtu ajo iu drejtua konkurentëve të Eurosong duke u thënë: “Ju të gjithë jeni fitues”.

Por performanca e saj në Tel Aviv nuk kaloi pa polemika, teksa dy prej balerinëve të saj në fund të perfomancës u shfaqën me flamujt e Izraelit dhe Palestinës të stampuar në veshjet e tyre.

Në një deklaratë të kësaj jave, Madonna ishte shprehur se donte të përdorte performancën e saj për të krijuar 'një rrugë të re drejt paqes' dhe nuk do të stepej nga presioni politik.

Eurovizioni ka konfirmuar se nuk kishte miratuar një shfaqje të tillë dhe se Madonna ishte e vetëdijshme se ngjarja duhet të jetë 'jo-politike'.

Ndërsa Madonna interpretoi këngën e saj të re " Future" me Migos Rapper Quavo, çifti qëndronte para një ekrani ku shkruhej 'Wake Up' .