Bashkitë që deri më tani i kanë kërkuar KQZ-së që të mos zaptojë ambientet e shkollave, kopshteve dhe çerdheve që ato kanë nën administrim, janë brenda ligjit dhe konkretisht ligjit për vetëqeverisjen vendore.

Rama ka kërcënuar hapur bashkitë që kërkojnë të respektojnë dekretin e Presidentit të Republikës që ka anuluar 30 qershorin si datë e zgjedhjeve lokale, duke përdorur edhe pushtetin mbi Prokurorinë që e ka siguruar me Arta Markun.

Madje Rama u ka turrur bashkiakëve të djathtë edhe policinë të cilën po e keqpërdor në funksion të plotësimit të egos së tij për të bërë zgjedhje moniste në këtë vend.

Sot, në një deklaratë për mediat, kryebashkiakja e Shkodrës Voltana Ademi dha alarmin se çakejtë, njerëzit e bandave, prezantohen si prokurorë dhe kërcënojnë punonjësit e administratës që ligji i ngarkon me zbatimin e punës së tyre.

Këta banditë janë të frymëzuar nga deklaratat publike të Ramës. Por në mungesë të një date zgjedhjesh me dekret nga Presidenti i Republikës, kry bashkiakët janë të detyruar të respektojnë ligjin. Pak ditë më parë detyrën e zbatimit të ligjit e kërkoi edhe Presidenca kur tha se këshillat bashkiakë do të ushtrojnë funksionin e tyre deri në formimin e këshillave të rinj. Po ashtu Presidenca tha edhe se kryetarët aktualë do të vazhdojnë detyrën deri në zgjedhjen e kryetarëve të rinj.