Ish-ministri i Brendshëm Saimir Tahiri ka shkuar sot në Gjykatën e Krimeve të Rënda. Në këtë gjykatë do zhvillohet seanca e parë gjyqësore ndaj Saimir Tahirit dhe 3 ish-drejtuesve te Policisë Vlorë, që akuzohen për trafik narkotikësh dhe krijimin e grupit kriminal. Tahiri pritet që sot të kërkojë gjykim të shkurtuar. Në grup me Tahirin janë edhe tre ish-policët në arrati, Jaeld Çela, Gjergj Kohila dhe Sokol Bode.

Ai akuzohet se ka kryer veprat penale ‘Trafikimi i narkotikëve’, në bashkëpunim, në formën e grupit të strukturuar kriminal, ‘Grup i strukturuar kriminal’ dhe ‘Kryerja e veprave penale nga organizata kriminale dhe grupi i strukturuar kirminal’ parashikuara nga nenet 283/a/1, 28/4/ dhe 333/a/2 të Kodit Penal.

Në maj të vitit 2018 Tahiri dorëzoi dhe mandatin e deputetit dhe u vu në dispozicion të drejtësisë. Pas kësaj organi i akuzës kërkoi sërish arrestimin e tij, por Gjykata vendosi që ta linte vetëm në masën “arrest shtëpie”.

Prokuroria ka kërkuar disa herë arrestimin e tij, por Gjykata nuk ka pranuar pasi nuk ka qenë e bindur nga provat e dorëzuara.