Frederica Mogherini, është pritur me pankarta nga dhjetra protestues teksa ishte duke mbërritur në kryeministri. Pankartat ishin të dizajnuara si pranga në duart e tyre, ndërsa kishte të stampuar orarin e kamerave të sigurisë që tregonin për arrestimin e një prej kuksianëve që protestuan në “Rrugën e Kombit”.
Të rinjtë protestues kërkonin të bënin apel për ndërkombëtarët.
“Hej! Zonja Mogherini! Nuk mund ta fusni Shqipërinë në BE, nëse qeveria e heq Kukësin nga Shqipëria”; “Hej, Zonja Mogherini! BE njeh forcën e ligjit, ne njohim forcën e policit!” ishin disa prej thirrjeve të tyre për zyrtaren e BE-së e cila ndodhej në Kryeministri për një takim me kryeministrin Edi Rama pas marrjes së rekomandimit.
Një prej tyre Irel Elezi tregoi se po proteston kundër arrestimeve të paligjshme të 23 kuksianëve, 11 prej të cilëve janë ende në qeli.
“Kjo është shprehje e lirë e individit. Protestojmë sepse shteti jonë policor, regjimi policor ka hyrë në shtëpinë e 25 familjeve kuksiane duke terrorizuar, gra, vajza, motra, fëmijë në orën 3 të mëngjesit, ndryshe nga sa thuhet në letrat e prokurorisë në 10 të mëngjesit. Nuk besoj se është dëshira e policëve. Jemi në protestë për arrestimet e paligjshme. Të gjithë ata që janë arrestuar dhe që ndodhen në burg janë familjarët e mi”, tha Irel Elezi.
“Synojmë të sensibilizojmë opinionin ndërkombëtar për arrestimet. Po bëhet reforma në drejtësi, se kuptoj ku e gjejnë guximin që bëjnë këto veprime”, u shpreh ai.
