Presidenti Meta gjatë vizitës në Përmet u prit nga kryetari i Bashkisë, autoritete vendore, deputetë e qindra banorë.

Ai mori pjesë në ceremoninë e çeljes së sezonit turistik në Bashkinë e Përmetit.

“Kënaqësi të jem në qytetin e trëndafilave. Përmeti na ka dhuruar përherë mikpritje, qytetari, kulturë, bujari, tolerancë e harmoni njerëzore.

Kontributi i përmetarëve për lirinë, përparimin dhe emancipimin e vendit është i jashtëzakonshëm.

Në këto troje kanë lindur vëllezërit Frashëri, udhëheqësit e Rilindjes sonë Kombëtare. Përmeti do të ngelet përherë djepi i shqiptarëve të mëdhenj dhe njerëzve të shquar të artit, kulturës, sportit dhe këngës.

Përmeti shembull i kulturës e edukatës qytetare, qytet i vlerave më të mira të kombit. Gëzohem që e gjej Përmetin përherë e më të bukur e me plot turistë e vizitorë vendas e të huaj”, tha ai.

Gjithashtu, presidenti Meta i akordoi titullin "Mjeshtër i madh" sportistit të mirënjohur përmetar Ethem Kaso.