“Nuk do të tolerohet asnjë biznes që derdh ujërat e zeza në det”, kështu u shpreh kryeministri Rama në konferencën e titulluar “Panairi Mesdhetar i Turizmit”.

Rama theksoi edhe njëherë atë që është thënë më herët nga Ministria e Turizmit se do të ndëshkohen të gjithë ata që kanë godina pranë vijës bregdetare dhe derdhin ujërat e zeza në det. Ai u bëri thirrje të marrin masa sa janë në kohë ende pa u hapur sezoni turistik, ose përndryshe do të ketë ndëshkime, siç tha Rama.

“Njoftimin e kanë marrë prej disa kohësh nuk do të lejohen dhe do të ndëshkojmë strukturat pritëse në bregdet që derdhin ujërat e zeza në det. Të marrin masa të pajisen me sistemet e depove. Mbase në këtë sezon nuk do arrihet gjithçka, por kushdo që mund të shkelë do ndëshkohet”, tha kryeministri.