Artistët më të njohur u bënë bashkë në Korçë në një prej veprave më të njohura të Naim Frashërit. Këtë herë “Ëndërrimet” erdhi nën interpretimin e aktorëve Margarita Xhepa, Dhimitër Orgocka, Gulielm Radoja, Rajmonda Bulku, Zamira Kita dhe Kristan Koroveshi, regjisor i shfaqjes. Një mbrëmje ndryshe artistike, një shfaqje që këtë herë që solli krijimtarinë e Naim Frahërit në Pazarin e Korçës. Interpretimet e artistëve të njohur për publikun u shoqëruan me notat muzikore në violonçel nga Lida Radoja. Regjisor dhe interpretues në vepër Kristian Koroveshi tregon se e zgjodhi veprën e Naim Frashërit për frymën mistike të saj. “Zgjodhëm veprën “Ëndërrimet” shkruar nga Naim Frashëri e para për frymën mistike të saj. Flet për dashurinë, njeriun, jetën, zotin, vepra flet për natyrën, flet për të gjitha gjërat që e bëjnë njeriun si qenie të botës dhe e veshin tërësisht atë. Nuk e lënë as dashnor, as besimtar, por e bëjnë figurën e përgjithshme të njeriut. Ky vepër është ribotim i fondacionit Shirazi. Shkrimi origjinal i Naim Frashërit për herë të parë është shkruar në persisht”, tregon regjisori. Këtë herë vepra e Naim Frashërit bëri bashkë aktorë të njohur të teatrit, emra të vlerësuar dhe të duartrokitur shumë nga publiku, ku e njëjta situatë u përcoll në Korçë. Jo në një skenë teatri, por një shfaqje që u prezantua me artistët në Pazarin e Korçës. Naim Frashëri i përfshirë nga kultura perse dhe vargjet sufi të Saadiut, Hafezit, shkroi dhe botoi qindra vargje në persisht, duke ndjekur traditën e letërsisë perse dhe modelet e poetëve të parapëlqyer më 1884 vëllimin me poezi prozaike "Katër stinët" (osmanisht e tejshkruar Fusuli erbea). Më tej shkroi dhe botoi më 1885 vëllimin poetik "Ëndërrimet" (persisht Tehajjulat). Libri “Tehajjulat”, ose siç ka ardhur në shqip me titullin “Ëndërrimet”, është vepra që ka ndriçuar prirjet shpirtërore të Naim Frashërit, sepse secila poezi është ngjizur ose me një lëndë moralistike, ose mbi bazën e misticizmit, ose mbi të vërtetën e krijimit të botës e të jetës, ku të gjitha kanë një bosht të përbashkët, i cili është qëllimi për ta çuar njeriun drejt përsosmërisë së plotë.