Ky lajm ka bërë bujë në të gjitha mediat dhe ka shqetësuar mbarë opinionin publik.

Ky rast është raportuar më 08.04.2018, por sot, policia bashkë me Prokurorinë Themelore të Ferizajt, gjatë hetimit të rastit kanë arritur në përfundim se ky rast nuk ka të bëjë fare me rrëmbim.

Madje, këtë e ka pranuar edhe vetë i mituri, Erlis Tafa, por edhe babai i tij, Adem Tafa.

Në një komunikatë për media e dërguar nga policia, thuhet se zbardhja e këtij rasti, është arritur pas sigurimit të të gjitha provave relevante, ndërkaq, sot, në prani të punëtorit social dhe të psikologes, është intervistuar i mituri, Erlis Tafa, i cili e ka pranuar se rasti është inskenuar.

Sipas tij, rastin e ka inskenuar bashkë me dy djemtë e xhaxhait të tij, me punë në Belgjikë, (V.T.21 vjeç dhe D.T.19 vjeç).

I mituri Erlis Tafa, gjithashtu, ka deklaruar se rastin e kanë inskenuar me qëllim që i njëjti të përfitojë dokumentacionin valid të shtetit të Belgjikës.

Policia e ka intervistuar edhe babanë e të miturit, Adem Tafa, i cili e ka pranuar dhe vërtetuar se rasti është inskenuar, por sipas tij, ai nuk kishte qenë në dijeni.

Lidhur me hetimet e këtij rasti është njoftuar edhe kryeprokurori i Prokurorisë Themelore në Ferizaj, i cili ka urdhëruar që rasti të procedohet në mënyrë të rregullt si, ”Lajmërim apo kallëzim i rremë", ndërsa SRH do të vazhdojë me hetimet e mëtejshme të rastit.