E enjtja do të jetë dita kundër arrogancës së qeverisë në vendimin e saj për prishjen e godinës së Teatrit Kombëtar.

Parlamenti ka futur për votim në seancën e të enjtes me procedure të përshpejtuar projekligjin më të turpshëm në historinë e parlamentarizmit. Ky projektligj parashikon shembjen e Teatrit Kombëtar, i cili është pjesë e ansamblit historik monumental të qendrës së Tiranës dhe symbol i identitetit kombëtar, si edhe kalimin e mbi 8000 m2 truall publik në pronësi të firmës Fusha.shpk e cila autorizohet të ndërtojë aty kulla shumëkatëshe.

Dhe për të mos e lejuar Ramën që ta çojë deri në fund dëshirën 20 vjeçare për ta gllabëruar truallin e teatrit, artistët kanë ftuar qytetarët që të bashkohen në orën 10.00 përpara parlamentit.

Artistët dhe qytetarët kanë 28 ditë të pandërprera që kundërshtojnë projektligjin, ndërsa kanë iniciuar edhe një peticion, të cilën e kanë firmosur deri më tani me mijëra qytetarë dhe mbështetës së artit.

E enjtja do të jetë dita finale e rezistencës. Ajo do të përqendrohet si jashtë parlamentit ku pritet të mblidhet një numër i madh qytetarësh, ashtu edhe brenda sallës së parlamentit.

Opozita i është bashkuar zyrtarisht artistëve dhe u ka premtuar se do të bëjë çdo gjë që ta ndalojë qeverinë.

Kryedemokrati Lulzim Basha premtoi gjatë protestës së artistëve se me forcën që i jep ligji do të bëjë përpjekje për të ndalur shembjen e Teatrit. Sipas tij, opozita do ti drejtohet presidentit nëse mazhoranca do ta miratojë me forcën e kartonëve.

E nëse Rama nuk do të ndalet, thirrje do ti bëhet edhe ndërkombëtarëve.