Kryetari i Kuvendit të Kosovës, Kadri Veseli, ka shprehur ngushëllime për vdekjen e Ish-Sekretarit të Përgjithshëm të Kombeve të Bashkuara, Kofi Annan, njofton Klan Kosova.
Veseli nëpërmjet rrjetit social facebook, ka përkujtuar Annan, duke shkruar: “Institucionet dhe qytetarët e Kosovës do ta mbajnë mend gjithmonë emrin e ish-sekretarit të OKB-së, Kofi Annan, i cili gjatë luftës në Kosovë dha kontribut të çmuar për lirinë e Kosovës. Me vdekjen e Kofi Annan, bota ka humbur një diplomat dhe një paqedashës humanitar”, ka shkruar Veseli.
Kofi Annan, ishte Ish-Sekretar i Përgjithshëm i Kombeve të Bashkuara, i cili është ndarë nga jeta sot në moshën 80 vjeçare.
Lajmin e ka bërë të ditur Agjencia e Migracionit e Kombeve të Bashkuara përmes llogarisë së tyre zyrtare në Twitter.
“Sot mbajmë zi për humbjen e një njeriu të madh, një lideri dhe një vizionari: ish-Sekretarit të Përgjithshëm të OKB-së, Kofi Annan”, thuhet në postimin e tyre.
“Një jetë e jetuar mirë. Një jetë që ia vlen të lartësohet”.
