Nga Kastriot Dervishi

Në librin e zi të komunizmit Skënder Hallko, lindur në Vranisht të Vlorës në vitin 1920, është “regjistruar” me 32 vjet, 7 muaj dhe 9 ditë. Të dy dënimet janë për tentativë arratisje. Hyri në burg në moshën 29 vjeçare dhe doli prej andej 62 vjeç. Një jetë e shkuar kot.

-Periudha e vuajtjes së burgimit:

1949-1964: 14 vjet 7 muaj 9 ditë

1964-1982: 18 vjet

-Mosha në fillim të dënimit: 29 vjeç

-Mosha në mbarim të dënimit: 62 vjeç

Dënimi i parë

U arrestua më 27.8.1949 në tentativë arratisje në fshatin Kolonjë të Gjirokastrës, ai u bë pjesë e një procesi, te i cili përziheshin edhe ngjarje të kaluara nga lufta. Me vendimin nr.90, datë 4.6.1950, Gjykata Ushtarake e Gjirokastrës në bazë të ligjit nr.372, gjykata e dënoi me 15 vjet burgim e konfiskimin e pasurisë. Dënime me 8-15 vjet morën edhe të dënuarit e tjerë . Pas shumë vitesh burgim nëpër burgje e kampe, u lirua më 9.4.1964. 

Dënimi i dytë

Pas lirimit nga burgu është dërguar në fshatin e tij në Vranisht. Duke mos patur asnjë shpresë tjetër për të jetuar, vetë, katër muaj pas daljes nga burgu, përpiqet për t’u arratisur përsëri. Mirëpo më 15.8.1964, ora 6.00 diktohet në Postën Kufitare të Radatit në Gjirokastër dhe ndalohet. Gjykata Qarkut të Vlorës me vendimin nr.44, datë 2.11.1964 e deklaroi fajtor dhe në bazë të nenit 64-10 të Kodit Penal e dënoi me 18 vjet burgim, të cilat i pandehuri i vuajti të plota. U lirua nga burgu më 15.8.1982.

=========k