Në Shqipëri me dy vendime të veçanta të Gjykatës së Krimeve të Rënda, janë arrestuar pasditen e së dielës dy ish deputetët e Partisë Socialiste, Arben Çuko dhe Arben Ndoka. Çuko, ish drejtori i Përgjithshëm i Burgjeve ka përfunduar në pranga nën dyshimet për korrupsion. Ai ishte shkarkuar nga detyra më 3 shtator të këtij viti “për keqmenaxhim të patolerueshëm dhe dyshime të forta për korrupsion” siç shpjegoi ministrja e Drejtësisë Etilda Gjonaj, e cila kishte bërë dhe propozimin për shkarkimin e tij.

Pak pas arrestimit të ish deputetit socialist, u njoftua se të njejtin fat kishte patur dhe ish kolegu i tij Arben Ndoka. Ky i fundit u arrestua së bashku me të vëllanë dhe një grup personash të tjerë, pasi dyshohen , sipas njoftimit të policisë “për veprat penale “Falsifikimi i dokumenteve”, Falsifikimi i vulave, stampave ose i formularëve”, “Shpërdorimi i tokës”, në kuadër të një grupi kriminal, të përfshirë në tjetërsim tokash. Hetimi disa mujor – shpjegon më tej njoftimi - ka mbledhur prova se ky grup kriminal dyshohet si i implikuar në abuzimet me troje shtetërore në zonën e Lezhës dhe Kurbinit, përmes falsifikimit të dokumenteve e vulave”.

Pas arrestimit të dy ish-deputetëve socialistë, si dhe ndalimit të disa zyrtarëve të institucioneve publike, Rama ka mbledhur ditën e sotme grupin parlamentar të PS-së.

Para të tijve Rama ka qenë tepër i ashpër duke folur për të korruptuarit dhe ata që kanë dështuar në drejtimin e këtyre institucioneve.

‘Kemi ca drejtore legena që po na nxijnë fytyrën me korrupsion e keqmenaxhim’,-mësohet të jetë shprehur Rama në mbledhjen e grupit parlamentar socialist..

Në fakt Rama është thjesht shefi i tyre dhe që i urdhëron. Këto fjalë i tha sa për të larë gojën dhe për ti bërë kurban ‘të larguarit’, duke mbrojtur kështu ata deputetë të inkriminuar që janë ende duke qeverisur vendin me kryetarin në krye.