5 persona kanë humbur jetën pasi një avion i vogël u rrëzua në një zonë të populluar të Mumbait.
Viktimat janë piloti, tre pasagjerë dhe një tjetër person që ndodhej në rrugë, në momentin që ra avioni, shkruan e përditshmja britanike “The Indipendent”.
Beechcraft King Air C90 ra në Ghatkopar, një zonë tejet e populluar, pranë një prej stacioneve më të mëdha të trenit dhe aeroportit të qytetit.
Nga raportimet paraprake mësohet se avioni i vogël ra në momentin që po bëhej gati për ulje. Në pamjet e publikuara nga mediat në vend shihet mjeti i përfshirë nga flakët, ndërsa në vendngjarje ndodhen forca të shumta policie dhe ato të zjarrfikëses.
Avioni i vogël i përshtatshëm për 7 pasagjerë dhe 2 anëtarë ekuipazhi ishte pronë e qeverisë së Uttar Pradesh, një shtet në veri të Indisë në kufi me Nepalin.
