Presidenti iranian po fajëson Shtetet e Bashkuara dhe aleatët e saj arabë të Gjirit Persik, për sulmin e ashpër në një paradë ushtarake në Iran, që vrau të paktën 25 vetë dhe plagosi rreth 70 të tjerë.
Hasan Rouhani, duke folur para se të largohej nga Teherani për të marrë pjesë në Asamblenë e Përgjithshme të OKB-së, tha: “Amerika po vepron agresivisht ndaj pjesës tjetër të botës”.
Kreu iranian vijoi se reagimi i vendit të tij ndaj sulmit është “brenda kuadrit ligjor dhe interesave tona kombëtare”. Rouhani tha se Shtetet e Bashkuara do të pendohen për “agresivitetin” e tyre.
Ambasadorja amerikane në OKB Nikki Haley dënoi sulmin vdekjeprurës, dhe shtoi se udhëheqësit e vendit duhet të shohin brenda vendit për të gjetur shkakun e trazirave.
