Universitetet kineze po kryesojnë në renditjen globale të Azisë, ndërsa institucionet lindore të arsimit të lartë po ngushtojnë hendekun me homologët perëndimorë, por në anën tjetër India mbetet prapa.
Universitetet britanike “Oxford” dhe “Cambridge” mbeten në vendin e parë dhe të dytë respektivisht, në renditjen botërore të “Times” për universitetet, me institucionet amerikane që dominojnë 100-shen e parë të listës.
“Stanford” ruan pozicionin e tij si institucioni amerikan më i mirë, në vendin e tretë të renditjes së përgjithshme, bashkë me Institutin e Teknologjisë së Massachusettsit, MIT, që ndodhet në vendin e katërt, apo Institutin kalifornian të Teknologjisë, në vendin e pestë.
Sidoqoftë, Japonia ia ka kaluar Britanisë së Madhe duke u bërë vendi i dytë më i përfaqësuar në tabelën me 103 universitete, me Mbretërinë e Bashkuar që po jep shenja stanjacioni dhe rënieje modeste.
Kina kryeson rritjen në hemisferën lindore me një nga universitetet e saj që është bërë më i rëndësishmi në Azi për të parën herë në renditjen e 1.250 universiteteve të botës.
Universiteti “Tsinghua” i Pekinit ka lënë pas Universitetin Kombëtar të Singaporit, që deri më tani ka qenë institucioni kryesor në kontinent, duke u renditur i 22-ti, pas një ngjitjeje prej 8 vendesh.
Në total, 72 universitete kineze janë përfshirë në klasifikimin më të fundit, ndërkohë që një vit më parë ishin vetëm 63. Për sa i takon Europës, Gjermania ka performancën më të mirë me 8 institucione në 100-shen e parë, përfshirë “LMU” në Mynih, që renditet i 32-ti.
Universiteti i Hamburgut ka shënuar po ashtu rritje, ndërkohë që Franca ka në 100-shen e parë vetëm dy institucione, “PSL” të Parisit dhe Universitetin e Sorbonës. Holanda, në anën tjetër, ka 7 universitete në 100-shen e parë. Risia e këtij viti është Universiteti i Bagdadit në Irak, që për të parën herë është përfshirë në klasifikim.
