Kryeministri i Italisë mohoi çdo përçarje midis dy palëve në koalicionin e tij qeverisës, pas raporteve mbi të ardhurat tatimore dhe këmbënguli se Roma do të ecë përpara me masat buxhetore ekspansioniste të planifikuara. Vërejtjet e tij erdhën pasi drejtuesit e Bashkimit Europian ngritën shqetësime rreth planeve buxhetore ekstravagante të Romës që mund të shtonin më tej borxhin publik të Italisë, i cili, në nivelin 133 për qind të prodhimit bruto vendas, është më i madhi në BE pas Greqisë.

Kryeministri Giuseppe Conte ( i cili nuk është nga asnjë parti politike), u pyet nga gazetarët për një përplasje të mundshme të koalicionit dhe u përgjigj: “Nuk ka përçarje”. Kur arriti në samitin e BE në Bruksel, Conte pranoi se planet e buxhetit për të rritur shpenzimet e mirëqenies, për të ulur moshën e daljes në pension dhe për të rritur deficitin, nuk kanë gjasa të kënaqin Komisionin Europian. Komisioni thotë se buxheti ka të ngjarë të shkelë rregullat fiskale të BE dhe të rrisë borxhin.

“Unë jam i vetëdijshëm se ky nuk është buxheti që Komisioni pret, megjithatë jam në pritje të observimeve kritike, do të diskutojmë dhe do t’i përgjigjemi atyre”- u tha gazetarëve Conte. Në samit, kancelari austriak Sebastian Kurz tha se rregullat fiskale duhet të respektohen nga të gjithë, duke shtuar: “Një borxh i madh është i rrezikshëm”.

Kancelaria gjermane Angela Merkel, në një takim me Conte, bëri thirrje për “dialog pozitiv” midis Italisë dhe BE-së mbi buxhetin. Udhëheqësit e BE mund të pyesin Conte për buxhetin në samit, edhe pse nuk është në agjendë. Në rishikimin e planeve buxhetore të Romës, Komisioni i BE mund të ngrejë shqetësime. Më pas, mund të vendosë ta kthejë buxhetin për ndryshime deri më 29 tetor, në atë që do të ishte një masë e paprecedent dhe që ka gjasa të shkaktojë trazira të mëtejshme në treg.