“Amnesty International” kritikoi Turqinë për sjellje “të turpshme” ndaj nëpunësve civilë turq, të cilët janë hequr nga puna pas puçit të dështuar në Turqi, në vitin 2016.

Janë rreth 130 mijë punonjës të sektorit publik që u shkarkuan me dekret gjatë gjendjes së emergjencës pas puçit të dështuar, për shkak të lidhjeve të pretenduara të tyre me komplotuesit, organizatat terroriste apo grupet e tjera që përbëjnë kërcënim për sigurinë kombëtare turke.

“Amnesty International” njofton se shumë prej tyre u shkarkuan pa asnjë justifikim, duke e bërë kësisoj të vështirë të sfidohet në rrugë gjyqësore shkarkimi. Një pjesë e madhe e tyre janë ende “në pritje të drejtësisë” dhe përballen me “të ardhme të pasigurtë”, thotë “Amnesty”, teksa shton se deri më tani, vetëm 6 000 persona janë rikthyer në vendet e tyre të punës.

Mes të shkarkuarve janë shumë mësues dhe oficerë policie.