Rreth 2,000 hungarezë protestuan jashtë parlamentit kundër legjislacionit të ri që i lejon punëdhënësit të kërkojnë nga stafi që të punojë deri në 400 orë në vit jashtë orarit të punës, një reformë që kritikët e tij e kanë quajtur “ligji i skllevërve”.

Partia qeverisëse e Fideszit e kryeministrit Viktor Orban e aprovoi ligjin gjatë ditës, duke përdorur shumicën e saj të madhe pasi partitë e opozitës kërkuan të bllokonin votimin.

Protestuesit bërtitën “Tradhtarë, tradhtarë” dhe “Orban vafsh në ferr” përballë qindra policëve që qëndronin jashtë ndërtesës së parlamentit. Ata u gjunjëzuan para parlamentit duke treguar që me këtë ligj do t’i kthejnë në skllevër.

Një fotograf i Reuters tha se turma hodhi objekte drejt oficerëve të policisë, të cilët u përgjigjën me spray djegës dhe gaz lotsjellës kundër protestuesve.

Sindikatat mendojnë se punonjësit mund të shfrytëzohen prej punëdhënësve për të punuar jashtë orarit dhe pa u paguar ashtu siç duhet.

Orban ka ndërtuar një sistem që kritikët e tij e shohin si autokratik, duke prekur bizneset, akademinë, gjykatat dhe mediat. Por, ai rrallë i ka zemëruar grupet e ndryshme zgjedhore në të njëjtën kohë.