Gjatë festimeve për të festuar Ditën e Pavarësisë, presidenti amerikan Donald Trump ka përshëndetur “burrat dhe gratë e guximshme” të ushtrisë amerikane gjatë një fjalimi të mbajtur në Memorialin Lincoln në Washington. “Ne festojmë historinë tonë, popullin tonë dhe heronjtë që mbrojnë me krenari flamurin tonë”, tha ai.

Ngjarja “Përshëndetje për Amerikën” paraqiti fluturime ushtarake dhe fishekzjarre. Kundërshtarët e akuzuan Trump për shpenzimin e parave dhe politizimin e festës përpara fushatës së tij të rizgjedhjes.

Pentagoni nuk ka zbuluar koston e festimeve, të cilën shumë besojnë se ishte frymëzuar nga vizita e Trump në një paradë të Ditës së Bastijes, e organizuar nga Presidenti francez Emmanuel Macron në vitin 2017.

Disa raporte thonë se Shërbimi i Parkut Kombëtar ka shpenzuar  rreth 2.5 milion dollarë për të mbuluar koston. Duke iu drejtuar një turme që kishte sfiduar shiun dhe temperaturat e larta, Trump nderoi ushtrinë.

Ai foli për betejën e Amerikës për pavarësi dhe vlerësoi “trashëgiminë e jashtëzakonshme” të vendit. “Së bashku ne jemi pjesë e një prej historive më të mëdha që u tregua ndonjëherë, historisë së Amerikës,” tha Trump në këtë ngjarje.

“Është historia e qytetarëve të guximshëm që nuk heqin dorë kurrë nga ëndrra për një të ardhme më të mirë dhe më të ndritshme”, vazhdoi ai. “Për sa kohë që nuk ndërpresim kurrë luftën për një të ardhme më të mirë … nuk do të ketë asgjë që Amerika nuk mund ta bëjë”.

Zona në Memorialin Lincoln ishte e mbuluar me flamuj dhe aty u shfaqën  automjete ushtarake. Dy tanke 70 ton të Abrams qëndruan në një rrugë anësore pasi ata ishin shumë të rëndë për zonat përreth memorialit.