Një neo-nazist i armatosur hapi zjarr mbi dy lokale në Gjermani, duke vrarë nëntë persona. Më pas ai vrau nënën e tij dhe qëlloi mbi veten. Ai është identifikuar si Tobias Rathjen, 43 vjeç.

Sipas BILD, ai kishte shkruar një manifest me 24 faqe. Në këtë manifest ai shkruante se duhen zhdukur disa shtete të tëra, si Izraeli, shumica e vendeve në Lindjen e Mesme dhe disa vende aziatike. Po ashtu ai kërkonte të shënjestronte Afrikën e Veriut, Amerikën Qëndrore dhe Jugore dhe të gjithë gjermanët e ‘papastër’.

‘Mendoj se duhet shfarosur gjysma e popullsisë,” shkruante Rathjen.

Jo vetëm kaq, ai postonte edhe planet e tij se si mund të ndihmonte kombëtaren gjermane të futbollit për të fituar Kupën e Botës dhe një strategji se si mund të zgjidhet konflikti në Irak dhe Afganistan brenda dhjetë vitesh.

Në faqen e tij ai postonte vazhdimisht linqe të teorive konspirative, përfshi ato ku tregohet se si alienët kanë rrëmbyer njerëz dhe u kanë bërë autopsinë. Në një video të postuar para disa ditësh, ai tërbohej me bazat e nëndheshme amerikane, duke thënë se ato janë kthyer në strehta të adhurimit të Satanit, ku abuzohet me fëmijët.

Rathjen e kreu sulmin mbrëmjen e shkuar. Viktimat e tij janë turq,  kurdë, një boshnjak dhe një polake. Mes viktimave mendohet se ishte edhe një grua shtatzënë.