Bazuar në atë çfarë ndodhi së fundmi në Gadishulli Korean, Presidenti i Këshillit Evropian, Donald Tusk i cili ka nisur një tur takimesh nëpër Ballkan ka pohuar se ‘e pamundura mund të bëhet e mundur’.
“Ajo çfarë kam dëgjuar sot nga Koreja dhe ajo që kam përjetuar në Ballkan ditët e fundit, do të duhej të ishte diçka pozitive për të gjithë, se e pamundura mund të bëhet e mundur dhe se gjithçka varet tërësisht nga vullneti i mirë dhe guximi i individëve’”, ka shkruar Donald Tusk në Twitter.
Këtë javë, Tusk ka vizituar vendet e Ballkanit Perëndimor, ku ka përçuar mesazhin se Bashkimi Evropian është dhe mbetet partneri i tyre më i besueshëm.
Tusk po ashtu i ka siguruar ato se kanë të ardhme evropiane, nëse i përmbushin kriteret.
Të premten dy Koretë janë zotuar se do të denuklearizojnë plotësisht Gadishullin Korean dhe kanë thënë se presin që fundi zyrtar i luftës të shpallet deri në fund të vitit.
