Me të drejtë media, politikanë, por edhe analistë të ndryshëm, deri tek njerëz të thjeshtë  kanë pyetur në këto ditë të zeza të fatkeqësisë se për çfarë u shërbejnë “miliarderët” e qeverisë, të cilët u bënë të tillë me paratë që vetë Rama e qeveria e tij u dha? Në listën e gjatë të donatorëve, dashamirëve e dhuruesve nuk figuron emri i tyre, madje ata as përmenden fare. Në rastin më të mirë kanë ikur jashtë shtetit. Ku janë miliardat e koncesioneve të rrugëve të veriut, që shkojnë mbi 140 miliardë euiro, ata të rrugëve jugut, koncesioneve të tjera, mjekësisë, ata që gllabërojnë shumicën e zërit të investimeve në buxhet? Ku është koncesioneri i Teatrit Kombëtar, i rrugës së Kombit, të Balldrenit, ku është “Fusha” etj, etj? Ata po presin shansin nga Rama që të nisin punën për gjahun e majmë, të kapin llokmat nga rindërtimi, të përfitojnë nga donacionet, ta shtrydhin mirë këtë buxhet. Fatkeqësisht Qeveria në këto 6 vite ka mbështetur dhe inkurajuar deri në majmëri me dhjetëra individë e firma të cilat kanë marrë pjesën e luanit nga taksat tona. Janë dhënë lloj lloj koncesionesh po si nuk u dha një për emergjencat civile?! E sot ata miliarderët e qeverisë nuk i ke për asgjë, as për të të ndihmuar e as për sy e faqe.