Nga Fahri Balliu

Në këto 5 vjet të qeverisjes së Edi Ramës është venë re një mbështetje e pazakontë e ndërkombëtarëve, e tepruar për nga normat diplomatike si dhe për nga roli që duhet të luajnë ata në marrëdhëniet bilaterale apo politerale. Kanë dy cilësi themelore këta ndërkombëtarët që mbështesin Ramën.

Një cilësi është fryma e majtë e Bashkimit Europian, ku në vendet kyçe janë individë të cilët kanë një background të thellë komunisto-majtiste dhe këta janë njëkohësisht segmentet më të infektuara anti-amerikane, për shkak të lidhjeve të vjetra me korridorin ruso-majtist. Kjo qëmtohet në disa nga votimet themelore në OKB të këtyre dhe të Ramës. Por, në këtë korridor shfaqet lidhja e ndikimit të kanalit anti-Trump, që vjen nga Amerika dhe që hyn në të njëjtën linjë me Mogherinin, ish-komuniste që adhuronte Arafatin. Linja dhe fryma që vjen nga SHBA, që zakonisht analistët e lidhin me Sorosin, është më shumë anti-Trump dhe më e gjerë sepse përfshin të gjithë segmentin pushtetar të traditës nga ka dalë Obama dhe të tjerë.

Gjithsesi, Rama e ka tepruar aq shumë dhe ata kanë gabuar aq shumë me Ramën që e zgjodhën si kalorës, saqë janë duke reflektuar por jo me ritmin e duhur. Megjithatë, ata do të bëjnë edhe një përpjekje, në muajin e ardhshëm. Kurse, cilësia e dytë e ndërkombëtarëve që mbështesin Ramën lidhet direkt me korrupsionin që ndërhyn dhe prek vatrat e ndërkombëtarëve. Ky korrupsion mund të jetë i drejtpërdrejt financiar ose politiko-financiar, ose një paaftësi profesionale dhe mediokritet diplomatik që niset nga parimi “ne jemi akredituar pranë qeverisë dhe do mbështesim qeverinë”. Po, këtu nuk mund të lemë pa thënë se mes ambasadorëve të BE-së në Shqipëri, Romana Vlahutin është pjesë e kabinetit dhe e ardhmja do të flasë shumë për të dhe rolin e saj, sepse veprimtaria e saj nuk do të mbyllet kurrë me rastin e largimit.

Gjithsesi, koha e dashurisë pa rezerva për aktorin "sharmant" dhe "modern", si pjesë e rekuizitës mashtruese, ka mbaruar. Rama po luan tablonë e fundit!