Kreu i PD-së Lulzim Basha ka folur nga oborri i selisë së PD-së, pasi opozita ka dorëzuar në KQZ edhe heqjen dorë të mandateve nga të gjithë kandidatët e listave.

Gjatë fjalës së tij, Basha është shprehur se Edi Rama ka mbaruar.

 ‘Mirë se vini në shtëpinë e lirisë! Sot në të 4-tën protestë radhazi, populli i bashkuar ka përfunduar etapën e fundit të shkrirjes së këtij parlamentit të krimit dhe hedhjes në kazanin e plehrave.

Dita e sotme ka meritën e ndezjes së shpresës për ditët që po vijnë. Sot e kemi dërguar njëherë e mirë në shtëpi, parlamentin e krimit. Kemi hapur shtegun e vetëm që do të kalojë vota e çdo shqiptari.

Zgjidhja është largimi një orë e më parë i shkaktarit kryesor, kryezullumqarit Edi Rama. Ikja e tij është fundi i pjesës së parë të kësaj beteje, që do të vazhdojë me bashkimin më të madh në këto 3 dekada.

Edhe miqtë e ngushtë, ata që janë përpjekur ta mbrojnë e dinë shumë mirë se Edi Rama ka mbaruar, regjimi i tij ka marrë fund’, tha ndër të tjera kreu i PD-së Lulzim Basha.