Një nga skandalet më të mëdha si ai i Unazës së Re, për vetë faktin se si kurrë më parë u falsifikua firma e sekretarit të Shtetit të Delaware në SHBA, me qëllim përfitimin e miliona eurove në xhepin e një biznesmenit të fuqishëm si Bashkim Ulaj, fshehur pas kompanisë fantazmë Dh Albania, duket se është harruar.

Megjithëse kanë kaluar muaj, jo vetëm që askush nuk është vënë përpara përgjegjësisë së këtij falsifikimi e mashtrimi por tashmë as nuk flitet më për këtë.

Avdjol Dobi, djaloshi 26-vjeçar i cili figuronte si përfaqësuesi ligjor i kompanisë “DH-Albania”, degë e kompanisë së huaj “D-Haberman”, regjistruar në Dalaware, vazhdon të shijojë lirinë e tij pasi autoritetet ende nuk kanë mundur ta arrestojnë, ndërsa biznesmeni Bashkim Ulaj dhe kompania e tij Gener 2 vazhdojnë aktivitetin normal.

Edhe Partia Demokratike e cila ishte e para që denoncoi këtë skandal, së fundmi as nuk e ka artikuluar dhe është mjaftuar me largimin e Damian Gjiknurit e Afrim Qendros, mesa duket të vetmit ‘kurban’ nga kjo histori mashtrimi me vlerë 18 mln euro.