Reagon kreu i degës së PS në Elbasan, Xhevahir Budani, pasi gjatë natës iu dogj makina tip ‘Ford’ e parkuar në oborrin e shtëpisë.

Ngjarja ka ndodhur gjatë orëve të vona të natës së mbrëmshme në lagjen“5 Maj” dhe paraprakisht mendohet se është e qëllimshme.

Siç raporton ‘faxnews’, Budani pretendon se nuk ka konflikte që mund të kishin çuar deri në këtë pikë, por nuk përjashton mundësinë se ka ndodhur për shkak të detyrës.

Faktin që djegia e mjetit është kryer vetëm pak kohë pasi ai dhe familja e tij ishin kthyer pas festimeve të datëlindjes së tij të 48-të, e bën edhe më të çuditshme dhe dyshuese. Ai pretendon se është synuar t’i përçohet një mesazh, por pa e ditur konkretisht se çfarë.

Aktualisht, Budani mban edhe postin e drejtorit të Operatorit të Shërbimeve të Kujdesit Shëndetësor për Qarqet e Elbasanit, Korçës dhe Beratit.