Lulzim Basha akuzoi Sandër Lleshajn se po i shërben me servilizëm të verbër kryeministrit Edi Rama. Kreu i pozitës tha se ministrin e Brendshëm nuk e lidh asgjë me këtë institucion, as vlerat minimale të qenies njerëzore, por shërbimi pa kushte ndaj Ramës, që e ka emëruar për t’u turrur ndaj qytetarëve.

“Do marshojmë më pas drejt Ministrisë së Brendshme ku sundon sot një njeri që nuk e lidh asgjë me Kushtetutë e ligj dhe as me vlerat minimale të qenies njerëzore, por vetëm servilizmi i verbër, vetëm shërbimi pa kushte ndaj padronit që e ka emëruar për t’u turrur me tërbim ndaj qytetarëve”, tha Basha nga protesta përpara Kryeministrisë.

Opozita akuzon ministrin Lleshaj se po përdor gaz helmues në protestat që organizohen që prej 16 shkurtit.