Presidenti i Republikës Ilir Meta i ka kthyer përgjigje kreu të komisionit të ligjeve, Ulsi Manja lidhur me dekretin e nxjerrë prej tij për anulimin e zgjedhjeve të 30 qershorit, dekret i cili pasoi nismën e socialistëve për shkarkimin nga detyra të Presidentit të Republikës.

Në përgjigjen e tij, kreu i shtetit thekson se vendimi është marrë në mbështetje të plotë me dispozitat kushtetuese dhe në mbrojtje të parimeve themelore që burojnë prej saj.

Por lidhur me këtë ka reaguar edhe analisti Neritan Sejamini. Përmes notave të forta të ironisë dhe sarkazmës, Sejamini këshillon kreun  e shtetit se si duhet të sillet para Komisionit të Ligjeve.

“Ulsi Manja ka njoftuar Presidentin Meta se, më daten 24, Kuvendi fillon procedurën e shkarkimit të tij dhe ai duhet të paraqitet në Komision para Ulsi Manjës, Xhemal Qefalisë dhe anetarëve të tjerë të Komisionit të Ligjeve.

Të isha unë si Presidenti do shkoja në Komision dhe, gjatë gjithë kohës që flisnin kokat e ligjit, do të vija të luheshin përgjimet në mikrofonin përpara. Presidentin nuk e përzenë dot me forcë nga seanca dhe as nuk ja marrin dot me forcë pajisjen me audion e përgjimeve”, shkruan Sejamini.