Nënkryetari i LSI-së, Petrit Vasili, akuzon Kryeministrin Edi Rama se me ndryshimin e ligjit për Rezervat Materiale të Shtetit, po i rrëmben qeverisë të drejtën e blerjes së arit të Shqipërisë dhe ia jep vetes. Përmes një denoncimi në rrjetet sociale, Vasili kujton se si ndryshimi është votuar nga Parlamenti.

Për nënkryetarin e LSIsë, Kryeministri i ka hequr qeverisë të drejtën që të vendosë, si deri më sot, për Mallrat e grupit A ku është ari pjesë kryesore e tyre dhe ka ligjëruar rrëmbimin në grushtin e tij.

“Edi Rama i ka dhënë vetes në mënyrë individuale të drejtën, që të blejë vetëm ai, me urdhër të tij, arin e Shqipërisë dhe jo qeveria siç ka qenë e vendosur me Ligjin. Nr. 9900, dt. 10. 04. 2008. Parlamenti i Edi Rams ka votuar ndryshimin e një pike të vetme në ligjin e Rezervave Materiale të Shtetit, pikërisht nenin 10. Me këtë ndryshim, Kryeministri ia ka hequr qeverisë të drejtën që të vendosë, si deri më sot, për Mallrat e grupit A, ku është ari pjesë kryesore e tyre, dhe ka ligjëruar rrëmbimin në grushtin e tij.

Në relacion skandaloz shpjegues të qeverisë, që shoqëroi ligjin thuhej se: kjo bëhej që këto blerje të kryheshin më shpejt, pra, të mos vonoheshin nga mbledhjet e qeverisë dhe se hierarkia e akteve të tjera e kërkonte. Ky mashtrim është sa bajat, aq edhe provon qëllimet e errëta personale të Kryeministrit në këtë aferë”, deklaroi Vasili.