Nga Petrit Vasili

Që reforma në drejtësi ka tre vjet që kapet nga qeveria dhe që s’ecën, këtë e shohin dhe e kuptojnë të gjithë, bile kjo nuk do edhe ndonjë zgjuarsi të madhe se është kaq e qartë.

Por se si dhjetra milion euro dhe dollarë nga BE dhe SHBA vazhdojnë, ecin dhe derdhen për një reformë që s’ecen dhe është kapur nga qeveria, këtë nuk e kupton njeri……

 Nuk e kupton njeri po e them për mirësjellje, sepse të gjithë e kuptojnë që çke me atë punë, duke filluar nga shqiptarët të parët, sepse nga që e kuptojnë shumë mirë, afër 90% e tyre i refuzuan votimet rilindase të 30 qershorit dhe ” sukseset” e kleptoqeverisë megjithë “suksesin madhështor” të reformës në drejtësi brenda, që i la pa gjykata dhe ku drejtësinë e kapi qeveria.

Reforma sukses i madh ose “Great Success” thonë me gojën plot.

Po pse nuk e kuptojnë Europianet këtë “suksesin e madh” xhanëm dhe vazhdojnë e nuk na i hapin negociatat për anëtaresim në BE për vite me radhë.

Po pse investitorët nuk e kuptojnë “suksesin e madh” dhe vetem ikin e ikin nga Shqiperia dhe shkojnë në Maqedoni, Kosovë e Mal të Zi dhe nuk vjen asnjë investitor i rëndësishëm në Shqipëri.

Po pse shqiptarët nuk e kuptojnë “suksesin e madh” dhe ikin me mijra e mijra nga Shqipëria, me që thonë se reforma u bë për popullin shqiptar.

Po pse nuk e kupton këtë “sukses të madh,” Departamenti Amerikan i Shtetit, që na e thotë troç në Raportet e tij se Shqipëria është vendi më i korruptuar në Europë, që krimi është këmbë kryq edhe në mes të Tiranës, që Shqipëria është bazë e krimit të organizuar për Europën, SHBA, Ameriken Latine dhe Lindjen e Mesme, që Shqipëria është shëndërruar në një lavatriçe gjigande parash të pista.

Po pse nuk e kupton këtë “sukses të madh” Komisioni Europian që na tregon me gisht katastrofën ekonomike ku po bie Shqipëria për shkak miliardave të koncesioneve hajdutërore, që kanë rrëmbyer 45 % të GDP së Shqipërisë.

Reformën si “sukses të madh” e kupton vetëm Rama dhe qeveria se grabisin miliarda siç duan dhe nuk i hyn gjëmb në këmbë pasi falë reformës kapen drejtësinë.

Reformën si “sukses të madh” e kuptojnë të gjithë ata që i bëjnë rrush e kumbulla dhjetra milion eurot dhe dollaret e Europës dhe Amerikës,mbushin xhepat dhe në fund do të thonë: “reformën e bëmë, por është e padukshme ndaj nuk e shikoni”.

Reformën e kupton si “sukses të madh” vetëm krimi dhe korrupsioni, që janë më rehat se kurrë sepse nuk ndëshkohen, ndaj edhe vetëm rriten e zmadhohen dhe kanë kapur për fyti Shqipërinë.

Mirë ne na thonë: Hajeni me zor reformën në drejtësi si “Great Success”, po atyre, që i paguajnë dhjetra milion eurot dhe dollaret dhe që e dinë shumë mirë çfarë është drejtësi e barabartë për të gjithë qytetarët dhe nuk e hanë për sukses këtë “Big Failure” si do t’ja bëjnë, çfarë do tu thonë, si do ti genjejnë, se minareja e dështimit nuk futet në xhep ????