Rama dhe Arta Marku po shfaqen kaq me arrogancë në opinionin publik sa nuk e kanë problem që dosjen më skandaloze të ndërhyrjes në zgjedhje atë të përgjimeve në Dibër, jo vetëm ta degdisin nga Krimet e Rënda në Dibër, por edhe të ngrenë në detyrë prokurorët që ndihmuan në fundosjen e saj.

Esmeralda Keshi Cami, pasi dha dorëheqjen nga dosja 184 që i mbërriti në derë, sot u rrit në detyrë duke u bërë anëtare e Këshillit të Lartë të Prokurorisë. Arta Marku dhe Edi Rama kanë lobuar mirë që kunata e personit kryesor që shantazhonte dhe kërcënonte dibranët për të votuar PS , Arben Keshi, të katapultohej në organin më të lartë të Prokurorisë.

Dosja 184 vazhdon të groposet nga qeveria në bashkëpunim me Prokuroren e Përgjithshme e përkohshme Arta Marku.

Nuk mjaftoi që u degdis në Dibër, duke e larguar nga Krimet e Rënda, por pak ditë më parë u lajmërua se hetimet mbi të do të shtyhen edhe 3 muaj të tjera me pretekstin se prokurorët  janë duke studiuar dosjen. Sakaq, dosja “184” ka ndryshuar edhe numrin, duke marrë numrin e ri “385”, për shkak se është regjistruar si procedim në Prokurorinë e Dibrës.

Të gjithë po çuditen se çfarë duhet më të hetohet mbi një dosje përgjimet e të cilës janë bërë publike dhe i madhe  i vogël ka dëgjuar se si pushtetarë të inkriminuar me në krye Edi Ramën dhe me Ulsi Manjën blejnë votat për zgjedhjet vendore dhe të përgjithshme në Dibër. 

Përgjatë tre viteve, dosja ndërroi disa duar prokurorësh dhe Krimet e Rënda u përballën me kritika publike për zvarritje hetimesh për shkak ‘të zyrtarëve të lartë të shtetit të kapur në përgjime’. Transferimi i çështjes në prokurorinë periferike të Dibrës i zbeh edhe më tej shpresat për drejtësi, ndërkohë që fati i hetimeve mbetet gjithashtu i paqartë.