Kreu i Forumit Rinor të Partisë Demokratike Belind Këlliçit ka zhvilluar një takim të rëndësishëm me kreun e grupit parlamentar të Partive Popullore Europiane Manfred Weber. Gjatë takimit është diskutuar për rrugën e Shqipërisë drejt BE-së dhe kushtet e vendosura nga Gjermania.

Reagimi i plotë i Belind Këlliçit:

Me kryetarin e grupit parlamentar të PPE (Partisë Popullore Europiane) në Parlamentin Europian, Manfred Weber, folëm për procesin e integrimit në BE.

Weber u shfaq skeptik për vendimin e Këshillit Europian pasi disa vende janë kundër për shkak të korrupsionit, krimit, drogës dhe mos funksionimit të demokracisë në vendin tonë.

Shqipëria është në një krizë të thellë politike dhe ka një sërë kushtesh për të përmbushur. Gjermania me vendimin e saj përmes vendosjes se 9 kushteve, i dha një mundësi Edi Ramës të ecë në këtë proces, por deri tani asnjë vendim nuk është ndërmarrë për të përmbushur kushtet e vendosura, të cilat janë sot në tryezën e të gjithë vendimmarrësve europiane.