Prej më shumë se një viti Edi Rama ka kërkuar tensione me banorët e “Unazës së re” , me rreth 500 familje të cilat nëse zbatohet projekti i korruptuar (u kapën shkelje dhe falsifikime për të përfituar 40 mln euro vetëm për 2 km rrugë) i zgjerimit të rrugës pa dëmshpërblim, dalin në qiell të hapur. Ndërsa kërkon tension duke provokuar banorët dhe i futur ata në burg, Rama prej një viti asnjëherë nuk ka pranuar që të komunikojë me këta hallexhinj që ai e di mirë se nuk janë vetëm ata kryefamiljarë që dalin e protestojnë, por mbrapa kanë edhe fëmijë dhe të moshuar invalidë që po u mbyllet jeta papritur. 

Banorët nuk kërkojnë asgjë tjetër përveçse një çati mbi kokë. Por si përgjigje nga Rama kanë marrë arrogancën e një njeriu që fëmijët e vet i ka siguruar me saraje miliarda lekë, apo vila luksoze në çdo qytet turistik. Si përgjigje kanë marrë terrorin e policisë. Edi Rama dhe banda e tij, me super të devotshmin Sandër Lleshaj, po e shndërrojnë Policinë e Shtetit në një institucion të turpshëm dhe të inkriminuar. Vendimi i qeverisë për të prishur të paktën 500 godina në zonën e Astirit në Tiranë, pa procedurë dhe kompensim të drejtë, është shkelje e të drejtave të njeriut dhe të drejtave kushtetuese të qytetarëve, të cilat janë një nga kriteret e pa përmbushura të Shqipërisë për hapjen e negociatave me BE-në.