Policia kriminale e Amsterdamit në Holandë nisi një hetim ndaj një taksisti shqiptar, të njohur me nofkën ‘Tarzani’. 51-vjeçari shqiptar, Besnik A. dyshohej se e përdorte licencën e taksisit për të ndihmuar një rrjet shqiptar të trafikut të drogës.

Ai kishte rregulluar një hapësirë të fshehtë në makinën e tij, e cila përdorej nga kriminelët me origjinë shqiptare.

Në mars të vitit të shkuar ai dërgoi disa qese me ‘plehra’ në një vend ku më vonë u zbulua se ishte një laborator heroine. Më 8 prill transportoi një kriminel shqiptar nga Holanda për në Bruksel. Në bagazhin e makinës kishte një çantë, e cila përmbante 16 kg kokainë.

Prokuroria kërkoi tre vite burg për të, por gjykata tha se nuk është shumë e bindur nëse drogën në makinë e ka futur vetë, apo nuk kishte dijeni. Edhe për laboratorin e drogës u tha e njëjta gjë.

Por gjykata e dënoi me gjashtë muaj burg për pastrim parash kriminale në vlerën e 88 mijë eurove. Shqiptarit i ishte gjetur një sasi e madhe parash, po ashtu edhe një makinë e mirë ishte në pronësinë e tij.