Paketa Anti-KÇK është një nismë antikushtetuese e cila bëhet në këto momente për të tërhequr vëmendjen nga problemet me të cilat po përballet vendi.

Kështu shprehet sekretari i përgjithshëm i LSI, Endrit Braimllari.

Sipas tij, LSI vlerëson çdo betejë kundër krimit të organizuar por krimi i organizuar nuk luftohet me propagandë, luftohet me strategji dhe vullnet të qeverisë.

"Nuk mundet Edi Rama pas 7 vitesh të luftojë krimin e organizuar sepse në këto 7 vite është kryeministri dhe qeveria e tij, që ka fuqizuar krimin e organizuar duke e mbështetur dhe duke i përdorur në fushatë për interesin e tij ashtu siç dolën në përgjimet zyrtare dosja 184 dhe 339. 

Përpjekjet e Edi Ramës për të kapur Gjykatën Kushtetuese janë të qarta sepse ai kërkon të ligjërojë paligjshmërinë e tij dhe të qeverisë së tij. Kalimi në Parlament i një ligji i cili kërkon të marrë një kompetencë kushtetuese të institucionit të Presidentit të Republikës mbi betimin e anëtarëve të Gjykatës Kushtetuese tregon qartë që Edi Rama dhe deputetët e tij ilegjitim janë tanimë një grup i strukturuar kriminal që duan të shkatërrojnë reformën në drejtësi duke kapur çdo institucion në këtë vend edhe duke ligjëruar paligjshmërinë etj", thekson Braimllari.