Operacioni Forca e Ligjit dhe nisma AntiKÇK u katandis në dërgim letrash dhe bllokime të përkohshme makinash. Nisma u duk se ishte një tjetër show mediatik.

Megjithatë, që prej fillimit të saj, kryeministri Edi Rama tentoi ta ‘vishte’ me idenë e një lufte të fuqishme ndaj krimit. Aq e fortë është kjo luftë, sa më i rrezikuari vetë është Edi Rama.

Më këtë ide, një lajm qarkulloi para pak ditësh në media. Gjithçka ishte inskenuar në mënyrë të tillë. Një komentues i bënte pyetje Edi Ramës për rrezikun që i kanosej dhe kryeministri i përgjigjej.

“Mblidhe veten mor i mjerë se do të të heqin kokën një ditë këta personat që po u konfiskoni pasurinë,” i shkruan një komentues.

Kurse Rama i përgjigjet: “E para, ti mos e qaj hallin e kokës sime, po bëj hyzmetin tëndes që ka futur ajër mesa shoh, se nuk ka mundësi që një njeri normal të mos e përkrahë këtë luftë kaq të qartë mes popullit dhe krimit”.

Për ironi, një rast tjetër i ngjashëm u shfaq të hënën, kur mediat raportuan se Vladimir Gjuta, një ish-i dënuar me një histori me ish-ministrin e Brendshëm, Saimir Tahiri, ka tentuar që të hyjë në selinë e PS kur brenda ishte Edi Rama dhe të tjerë zyrtarë të lartë.

Se përse do hynte Gjuta në seli, kur ajo ishte super e blinduar në këtë ditë, kjo nuk dihet. Më vonë u tha se Gjuta kishte një shumë parash me vete dhe do e shkëmbente te pika e valutës aty pranë. “Prandaj më duhej pistoleta,” ka thënë Gjuta.