Pas thirrjes së kryeministrit Edi Rama për një “bashkim fanele  me ngjyrat kuqezi”, me qëllim integrimin e Shqipërisë në BE vjen edhe kundërpërgjigja e kreut të PD-së Lulzim Bashës.

Kreu i PD-së thotë se ai i ka marrë përgjegjësitë e tij dhe se tashmë është koha e Ramës të marrë të vetat.
Basha foli edhe për një listë arrestimesh që siç u shpreh ai, nuk është hartuar nga opozita por nga agjencitë ligjzbatuese në Europë.

“Thirrja ime për Edi Ramën... Unë e kuptoj ankthin e një kryeministri deficent në 5 kritere por ky ankth nuk do i largohet, vetëm do i shtohet nëse nuk ndërpret hapat që BE pret për hapjen e negociatave në BE. Ne do vazhdojmë me përgjegjësi totale të bëjmë punën tonë, kërkojmë hapjen e negociatave dhe shpresojmë që kjo përpjekje të japë fryte pozitive, ne nuk kemi asnjë sinjal që Gjermania është skeptike, ajo që na u tha ne i është thënë dhe atij para dy javësh, nuk zgjidhet problemi duke e fshehur problemin, është mësuar t’i thotë të bardhës së zezë dhe të zezës së bardhë.

Opozita e ka Europën aleate në krah. Pengesa më e madhe e hapjes së negociatave është qeveria, ky është momenti që gjithsecili të marrë përgjegjësitë e veta, unë i kam marrë të miat, PD i ka marrë të vetat, opozita i ka marrë, tani është ora që Edi Rama të marrë përgjegjësitë e tij, mos fshihet pas fishekzjarreve e shashkave, të marrë përgjegjësitë për arrestimin e Saimir Tahirit, të marrë përgjegjësinë duke lejuar drejtësinë të vërë para drejtësisë çdo politikan të korruptuar, s’bëhet fjalë për listë të hartuar nga opozita. Dua t’i them sot Edi Ramës e gjithë shqiptarëve këto janë lista që burojnë nga agjencitë e ligjzbatimit në Europë e Bashkimit Europian”, u shpreh Basha ndërsa theksoi se nuk janë hapur negociatat për Shqipërinë në BE por thjesht është marrë rekomandim pozitiv nga KE. Janë vendet anëtare të BE ato të cilat do vendosin për çeljen e negociatave.